Португали 2: 1 Мексик. Санкт-Петербург хотноо Конфедерөцийн хүрэл медалийн төлөө тоглолт тун өрсөлдөөнтэй болж өндөрлөлөө. Мексикчууд хоёрдугаар үеийн 54 дэх минутанд гоолдож, тоглолтыг 91 дэх минут хүртэл хошуучилсан. Дахиад, ердөө л 2 -хон минут тэсэж чадсан бол Мексикчууд хүрэл медалийг өвөртлөн эх орондоо харих байлаа. Гэвч Португалийн багийн сүүлчийн довтолгоон, талбайн баруун хэсгээс давуулсан бөмбөгийг Пепе хөл тавин оруулж харьцааг 1:1 болгон тэнцүүлснээр нэмэлт цаг сунгасан. Нэмэлт тоглолтын явцад Мексикийн тоглогч 16-д алдаа гаргаснаар тоглоотын хувь заяаг шийдсэн. Торгуулийн 11 метрийн цохилтыг Португалийн Андре амжилттайгаар цохисноор 2:1 харьцаагаар португальчууд тэргүүлж эхлэх нь тэр. Мексикчууд оройтсоноо ухамсарлаж,хичнээн ширүүн довтолсон ч, Португалийн хаалтыг сэтэлж чадсангүй. Ийнхүү Рональдо тэргүүтэй португальчууд 2016 оны Европын аваргын алтан медаль дээрээ Конфедерацийн хүрэл медалийг нэмлээ.
Э.БАЛЖАА
