Тулгар төрийн 2226 жил, Их Монгол Улс байгуулагдсаны 811 жил, Үндэсний эрх чөлөө, тусгаар тогтнолоо сэргээн мандуулсны 106 жил, Ардын хувьсгалын 96 жил, Үндэсний их баяр наадам сайхан болж байна.
Баяр наадамд зориулсан шагайн харваа үргэлжилж байна. Шагайн харваанд 62 багийн 558 харваач оролцож байгаагаас найм нь ахмадын баг байна. Шагайн харваа хасагдах журмаар болдог бөгөөд шилдэг 16-д үлдсэн багийг дөрөв дөрвөөр нь дөрвөн зоонд хуваана. Эндээс шалгарсан 8 багийг дөрөв дөрвөөр нь хоёр зоонд хуваан харвуулдаг дэгтэй.
Зооноосоо түрүүлж гарсан баг нөгөө зооны багтай л өрсөлддөг. Энэ оныг хүртэл ахмадын болон залуучуудын багууд хамт харвадаг байсан бол энэ жилийн наадмаас эхлэн тус тусдаа ангилалд харваж байна. Спортын бусад төрлүүдээс ялгаатай нь шагайн харваанд нас заахгүй тул ахмадууд энэ спортод шимтэх нь их. Өнөөдөр шилдэг эхний 3 байрт шалгарсан багуудад шагнал гардуулна.