Монголын залуучуудын шигшээ баг “2018 оны 23 хүртлэх насны АШТ”-ий урьдчилсан шатны тэмцээнд оролцож байна. Манай баг эхний тоглолтоо тэмцээнийг зохион байгуулагч Тайландын багтай хийж 1:1-ээр тэнцэж эхний оноогоо авлаа. Манай баг тоглолтын эхнэээс хамгаалж тоглож байсан ч 17 дахь минутад талбайн эздээс 10 дугаартай хагас хамгаалагч Чайяарат Буран гоолдож тооны харьцааг нээв.
Эхний хагас 1:0-ээр өндөрлөсөн учраас манай баг шийдвэрлэх үед урагш довтолж гоол оруулах даалгавартай тулсан. Улмаар ахлах дасгалжуулагч Майкл Вайсс довтолгооны сэлгээ хийж, Т.Мөнхсүлд, П.Энхбилэг нарыг талбайд оруулсан юм. Энэ сэлгээ ч үр ашигаа өгч Т.Мөнхсүлд багтаа торгуулийн цохилт гүйцэтгэх эрх авч ирснийг шигшээ багийн 10 дугаартай хагас хамгаалагч М.Төгөлдөр амжилттай гүйцэтгэж, 89 дэх минутад тоог тэнцүүлсэн.
Манай залуус үлдсэн хугацаанд 1:1 гэдэг үр дүнг хадгалаж чадсанаар “H” хэсгийн хамгийн хүчтэй баг болох Тайландаас оноо салгасан. Залуучуудын шигшээ баг дараагийн тоглолтоо 21-ний өдөр Индонезийн эсрэг хийх юм. Энэ хэсгийн нөгөө тоглолтод Малайзын баг Индонезыг 3:0-ээр хожсон байна.