Мэргэжлийн сүмогийн долдугаар сарын Нагоя башё энэ сарын 9-нд эхэлсэн.Башёгийн дундаас аварга Какүрюү М.Ананд, Кисеносато нар бэртлийн улмаас өнжсөн. Энэ нь боломжийг Хакухо М.Даваажаргал амжилттай ашиглаж 12 өдрийн дараах байдлаар тэмцээнийг ганцаараа тэргүүлж байна. Тэрээр өнөөдөр нутаг нэгт Тамаваши Мөнх-Оргилыг давж мэргэжлийн сумод 1047 ялалтаа байгуулснаар озеки Кайогийн дээд амжилттай зэрэгцэж байгаа юм. Хакухо тэмцээний 13 дах өдөр Такаяасутай барилдах бөгөөд ялбал дээд амжилт тогтоох юм. Энэ талаар аварга “Озекигийн амжилттай зэрэгцэн ирсэндээ баяртай байна. Юу мэдэрч байгаагаа үгээр илэрхийлж чадахгүй нь. Өнгөрсөн хагас жилийн турш би бэртэл гэмтэл болон бас бус зүйлийг даван туулсан минь энэ мундаг рекордыг амжилттай гүйцэхэд тус болсон гэж бодож байна. Маргааш энэ рекордыг шинэчлэн тогтоохыг хүсч байна” гэж хэлсэн байна. Энэ сарын тэмцээнийг Хакухо 11 даваатай тэргүүлж байгаа бол Аояама 10 даваатай удаалж байгаа юм.