Н.Насанбуян залуучуудын ДАШТ-нээс хүрэл медаль хүртлээ Финландын Тампере хотод болж байгаа залуучуудын ДАШТн-ий эхний өдрийн медалийн төлөөх барилдаан болж, эрэгтэйчүүдийн 50 кг-ын жинд өсвөр үеийн ДАШТ-ий хүрэл, Азийн АШТ-ний мөнгө, залуучуудын Азийн АШТ-ний алт, хүрэл медальт, залуучуудын улсын хошой аварга “Хасу-Мегастарс” клубийн тамирчин Нармандахын Насанбуян хүрэл медаль хүртлээ. Насанбуянгийн жинд 15 бөх барилдснаас эхний даваанд Туркийн Явуз Фатих Сентуркэд зургаан оноогоор хожигдож явсан ч өрсөлдөгчөөсөө хоёр оноо авч улмаар даралтаар цэвэр ялсан.
Харин шөвгийн наймд энэ жилийн залуучуудын АШТ-ний хүрэл медальт Армений Карен Зурабянд 2:13 буюу оноогоор цэвэр ялагдсан юм. Армений бөх шигшээд шалгарснаар түүнд дагаж барилдах боломж гарч ирсэн. Улмаар дагах барилдаанд Косовогийн Дрилон Силаг 14:2-оор, хүрэл медалийн төлөөх барилдаанд Казахстаны Рахат Калзаныг 6:4-өөр ялсан юм. Мөн энэ өдөр 60 кг-ын жинд “Алдар” спорт хорооны тамирчин Ц.Цогбадрах зодоглож тэгшитгэлд Казахстаны Аслан Кунишбековыг 3:2-оор, хоёрдугаар тойргийн барилдаанд Киргизстаны Эрназар Акматалиевийг 12:0-ээр тус тус ялсан ч шөвгийн наймд Энэтхэгийн Равиндер Равиндерт 2:2-оор буюу сүүлийн оноогоор ялагдаж жиндээ наймдугаар байр эзлэсэн.
Өнөөдөр буюу ДАШТ-ний хоёр дахь өдөр эрэгтэйчүүдийн 55, 66, 84, 120 кг-ын жингийн барилдаан болох бөгөөд манай улсаас 66 кг-д “Хасу-Мегастарс” клубийн тамирчин Э.Тэмүүлэн, 120 кг-д “Аварга” сургуулийн тамирчин Д.Эрдэнэтулга нар барилдана.