Чөлөөт бөхийн залуучуудын ДАШТ Финландын Темпере хотод үргэлжилж байна. Тэмцээний хоёрдох өдөр эрэгтэйчүүдийн 66 кг-ын жинд залуучуудын УАШТ-ний мөнгө, хүрэл медальт, Жон Петерсоны нэрэмжит тэмцээний аварга Дархан-Уул аймаг, “Хасу-Мегастарс” клубийн тамирчин спортын мастер Энхтуяагийн Тэмүүлэн хүрэл медаль хүртлээ.
Э.Тэмүүлэн тэгшитгэлд Беларусийн Александр Куриштаг 13:2-оор, Румыний Стефан Команыг 10:0-ээр тус бүр ялсан ч шөвгийн наймд АНУ-ын Райан Эндрью Декинтэй хүнд барилдаан хийж 6:7-гоор ялагдсан. Тэрбээр эхний үед 6:0-ээр давамгайлсан ч удаах үеийн барилдаанд зургаан оноо алдсанаар ялагдал хүлээсэн юм. Түүний өрсөлдөгч нь шигшээд шалгарсанаар дагах барилдаан гарч, Украйны Александр Рыбалког 13:2-оор ялсан.
Хүрэл медалийн төлөөх барилдаанд энэ жилийн Тайжуны Азийн АШТ-нд ялагдаж байсан Ираны Али Хоссейныг 6:4-өөр хожсон. Энэ нь түүний залуучуудын ДАШТ-нээс хүртсэн Монголын тамирчдын 26 дахь хүрэл медаль болж байна. Ийнхүү “Хасу Мегастарс” клубийн хоёр тамирчин залуучуудын ДАШТ-ний медалийн тавцанд зогслоо.
О.ДАШНЯМ
