“Монголын Хөлбөмбөгийн Холбоо”, “Арвайн үндэс” хувьцаат компанитай хамтран зохион байгуулж буй “Хүрхрээ үндэсний лиг”-ийн 11-р тойргийн тойргийн тоглолтууд явагдлаа. Энэ өдөр лигийн хүснэгтийн дэд байрт бичигдэж буй Г.Дашням эзэнтэй “Улаанбаатар сити” клуб Ч.Мөнхчулуун эзэнтэй “Дэрэн”-гийн залуустай тулсан юм.
Дэрэнгийн хувьд 14 оноотой хүснэгтийн тавдугаар бичигдэж байсан тул хожих даалгавартай талбайд гарсан. Эхний үед багууд хамгаалсан тоглолт үзүүлж хуурай тэнцээгээр өндөрлөсөн. Шийдвэрлэх хоёрдугаар үеийн эхэнд “Дэрэн”-ийн залуу хагас хамгаалагч Ц.Баасанжав булангийн цохилтоос ирсэн бөмбөгийг өөрийн хаалгандаа гоолдож “багаа хөөдсөн”. Гоол хийх даалгавартай нүүр тулсан Вояканы залуус хэд хэдэн довтолгоо өрнүүлсэн ч гоол оруулж чадаагүй. Харин тоглолтын 80 дахь минутанд “Улаанбаатар сити”-гийн “шинэ цэрэг” О.Мижиддорж залуу тамирчин Б.Цэрэнбаярын дамжуулалтаар гоол оруулж багийнхаа тэргүүллийг баталгаажуулсан. Улмаар тоглолт энэ үр дүнгээр өндөрлөж “Улаанбаатар сити” 24 оноотой хүснэгтийн дэд байраа хадгалж чадсан бол “Дэрэн” 14 оноотой хүснэгтийн тавдугаарт бичигдэж байна. “Хүрхрээ” үндэсний дээд лигийг арваннэгэн тойргийн дараах байдлаар “Эрчим” клуб 28 оноотойгоор тэргүүлж байна.
О.ДАШНЯМ