Оюутны зуны спортын универсад наадам Тайванд үргэлжилж байна. Наадмын жүдо бөхийн төрлийн тэмцээний хоёрдох өдөр эрэгтэй 81,90 эмэгтэй -78, 70, 63кг-ийн жингийн барилдаанууд явагдлаа. Эрэгтэйчүүдийн 81кг-д Солонгосын Леесен Су алт, ОХУ-ын Аслан Лаппинагов мөнгөн медаль, Бразил болон Германы тамирчид хүрэл медаль зүүжээ.
Энэ жинд зодоглосон ОУХМ Баянмөнхийн Гаажадамба нэгдүгээр тойрогт Украйны тамирчинд хожигдож тэмцээнийг орхижээ. 90кг-д Солонгосын тамирчин дэлхийн аварга Гвак Донхан торолгүй түрүүлсэн бол Оросын Станислав Ретинскы мөнгөн медаль зүүж Азербайжаны Дадашов, Японы Мукай нар хүрэл медалийн тавцанд зогслоо.
Эмэгтэйчүүдийн -78 кг-д Италийн Валериа алтан медаль, Солонгосын Лее мөнгө, Орос болон Германы бөхчүүд хүрэл медаль хүртжээ. 70 кг-д Бразилийн шилдэг тамирчин Тимо Барбара алтан медаль хүртэж, Японы Саки мөнгө, Солонгос болон Италийн бөхчүүд хүрэл медаль хүртлээ.
Энэ жинд ОУХМ Мөнхбатын Даваасүрэн эхний тойрогт Италийн бөхөд хожигдсон. 63кг-д жүдо бөхийн эх орон Японы тамирчин Айми алтан медаль, Алжирын Белкади мөнгөн медаль, Герман болон ОХУ-ын бөхчүүд хүрэл медаль зүүжээ. Энэ жинд зодоглосон ОУХМ Баярбатын Баасанжаргал нэгдүгээр тойрогт Голландын бөхөд ялагджээ.
.JPG)
