Бөхийн чөлөөт Дэлхийн аварга шалгаруулах тэмцээн сонгомол бөхийн барилдаанаар өчигдөр Парисд эхэллээ. Монголын тамирчдын барилдаан өнөөдрөөс эхэлж байгаа юм. Эмэгтэйчүүдийн 55 кг-д залуучуудын дэлхийн аварга ОУХМ Э.Даваачимэг эхний тойрогт Украйны бөх Татьяанатай хийж ялсан тохиолдолд Солонгосын бөхтэй барилдах сугалаа татсан байна.
Харин 58кг-д зодоглох залуучуудын дэлхийн аварга, насанд хүрэгчдийн Монгол улсын аварга Алтанцэцэгийн Батцэцэг эхний даваа Казахстаны тамирчинтай барилдана. Ялсан тохиолдолд Нигер болон Норвегийн тамирчдын ялсантай хүч үзнэ.
63 кг-д Иван Ярыганы нэрэмжит тэмцээний хошой аварга П.Орхон эхний тойрогт Энэтхэгийн Шили Шерантай барилдаж ялбал Швед болон БНСУ-ын тамирчдын хожсонтой барилдана.
75кг-д ОУХМ Г.Уртнасан анх удаагаа ДАШТ-ний дэвжээнд гарна. Тэрээр эхний даваанд Францын Чарлин Медисонтой барилдана.