П.Орхон Монголоос төрсөн тав дахь Дэлхийн аваргааар тодорлоо. Францын Парис хотод эхэлсэн чөлөөт бөхийн насанд хүрэгчдийн ДАШТ-ний эмэгтэйчүүдийн 63 кг-д зодоглосон “Алдар” спорт хороо, “Аваргууд” академийн тамирчин ОУХМ П.Орхон алтан медаль хүртлээ.
П.Орхон эхний даваанд Энэтхэгийн бөхийг хоёрдугаар тойрогт Швед, гуравдугаар тойрогт Нигер, хагас шигшээ барилдаанд Колумбийн тамирчдыг ялж аваргын төлөө барилдах эрхтэй болсон. Алтан медалийн төлөөх хариуцлагатай барилдаанд ДАШТ-ний алт, хүрэл медальт Украйны бөх Юлья Ткачыг 6:3-аар хожиж төрийн дууллаа эгшиглүүлсэн юм.
Ийнхүү Алдар спорт хорооны дасгалжуулагч Ц.Хосбаяр, Ц.Цогтбаяр нарын гарын шавь П.Орхон чөлөөт бөхийн дэлхийн аварга болсон Монгол Улсын тав дахь тамирчнаар тодорч байна.
О.ДАШНЯМ