Аваргуудын лигийн урьдчилсан шатны тэмцээний сүүлийн тоглолтууд өнгөрсөн шөнө явагдлаа. Энэхүү тэмцээний таван удаагийн аварга Ливерпүүл талбайдаа Германы шилдэг баг болох Хоффенхаймыг хүлээж авсан. Эхний тоглолтод “улаан”-ууд өрсөлдөгчөө 2:1-ээр хожоод байсан тул тэнцэхэд л аваргуудын лигид орох боломжтой байсан юм.
Юрген Клоппын залуус эхний 20 минутанд л гурван гоол хийж асуудлыг эрт шийдсэн. Тоглолтын 10 дахь минутанд Манегийн өсгийлдсөн дамжуулалтыг Эмре Жан төгсгөж гоолдсон бол 18 дахь минутанд Уиналдумын цохьсон бөмбөг шон ойгоод гарч ирснийг Сала нэмж гоол хийсэн. Үүний дараахан Манегийн хөндлөн дамжуулалтыг Эмре Жан гоол болгосон юм. Хоффенхаймын довтлогч Ют 29 дэх минутанд гоол оруулж багтаа итгэл найдвар авчирсан ч хоёрдугаар үед Фирмино багийнхаа дөрөвдэх гоолыг оруулсан.
79 дэх минутанд Уагнер тоорны харьцааг ойртуулсан ч тэдэнд хангалттай цаг үлдсэнгүй. Ийнхүү Английн Ливерпүүл Хофенхаймыг хоёр тоглолтын нийлбэр дүнгээр 6:3-аар “бут ниргэж” гурван жилийн дараа аваргуудын лигид дахин тоосоо өргөхөөр боллоо.
Энэ өдөр Азербайжаны "Карабах" клуб Данийн “Копенгаген”-тай тоглож талбайдаа 0:1-ээр хожигдсон ч, хариу тоглолтод 2:1-ээр ялж аваргуудын лигид анх удаагаа өрсөлдөхөөр болсон юм. Мөн Оросын ЦСКА , Португалын Спортинг, Киприйн Апоэл зэрэг багууд аваргуудын лигид өрсөлдөх эрхээ авсан байна.