Жүдо барилдааны насанд хүрэгчдийн дэлхийн аварга шалгаруулах тэмцээн Унгарын Будапешт хотод эхэллээ. Энэ удаагийн ДАШТ-нд таван тивийн 78 орны шилдэг жүдочид Будапештийн татамид чуулж байгаа юм.
Эхний өдөр эрэгтэйчүүдийн 60, эмэгтэйчүүдийн 48кг-ийн жингийн барилдаанууд явагдсан. Эмэгтэйчүүдийн 48 кг-д барилдсан Дэлхийн аварга М.Уранцэцэг мөнгөн медаль хүртэж дэлхийн хос медальтан боллоо. Тэрээр хагас шигшээ барилдаанд Японы тамирчин Кондо Амиг хожиж алтан медалийн медалийн төлөө Японы өөр нэг тамирчин Фуна Танокид ваззари үнэлгээгээр ялагдсан юм. Энэ жинд Казахстан улсын тамирчин Г.Отгонцэцэг Оросын Ирина Долгаваг цэвэр ялж хүрэл медаль зүүсэн.
Эрэгтэйчүүдийн 60 кг-д Дэлхийн аварга Г.Болдбаатар шилдэг наймд үлдээд Узбекистаны Урозбоёвт хожигдсон. Дагах тойргийн барилдаанд Дэлхийн аварга, олимпийн наадмын мөнгөн медальт Сметовыг хожиж хүрэл медалийн төлөө Чехийн Петриковыг ялж Дэлхийн хос медальтан боллоо.
Энэ жинд МУГТ Д.Амартүвшин барилдаж хоёрдугаар тойрогт Казахстаны тамирчин Кыргызбаевт ялагдаж тэмцээнээ өндөрлүүлсэн. ДАШТ-ний хоёрдох өдөр эрэгтэйчүүдийн 66 кг-д ОУХМ Г.Хэрлэн, эмэгтэйчүүдийн 52 кг-д ОУХМ Ч.Аззаяа, Б.Хорлоодой нар барилдана.
.JPG)
