Унгарын нийслэл Будапешт хотноо жүдо бөхийн ДАШТ-н багийн аварга шалгаруулах барилдаан болж өндөрлөлөө. Монголын баг А хэсэгт Япон, Алжир, Украйн, Германы багтай оноолт таарсан юм. Энэ удаагийн ДАШТ-ээс эхлэн багийн барилдааныг хольмог төрлөөр зохион байгуулж эхлэсэн юм. Манай тамирчид эхний барилдаанаа Германы багийн эсрэг хийж -57 кг-д Д.Сумъяа, эмэгтэй -70 кг-д Ц.Наранжаргал, эмэгтэй +70 кг-д Б.Мөнхтуяа, эрэгтэй -73 кг-д Г.Одбаяр, эрэгтэй -90 кг-д Г.Алтанбагана, эрэгтэй +90 кг-д Ө.Дүүрэнбаяр нар зодоглож, 4:2 харьцаатай ялагдал хүлээж тэмцээнээ өндөрлүүллээ.
Ингэснээр Монголын баг тамирчид нэг алт, нэг мөнгө, дөрвөн хүрэл медаль хүртсэн амжилтаар энэ жилийн тэмцээнийг өндөрлүүлж байна. ДАШТ-д багийн амжилтаар Японы тамирчид тэргүүлсэн бол Франц удаалж Монголын баг гуравдугаар орсон юм.
О.ДАШНЯМ
