Нийслэлийн Шүд, эрүү, нүүрний төв нь ХБНГУ-ын “Хил хязгааргүй шүдний эмч нарын холбоотой хамтран өдгөө хоёр дахь жилдээ ажиллаж байгаа билээ. Энэхүү хамтын ажиллагааны хүрээнд өнгөрсөн 2016 онд тус холбооноос Шүд, эрүү, нүүрний төвийн Нүүр амны эмчилгээний тасагт ISO стандартыг бүрэн хангасан, “Western dental standard”-аар үйлчлэх кабинетыг иж бүрэн тохижуулж суурилуулан хүлээлгэн өгч байсан юм.
Тэгвэл өчигдөр тус төвд “Хил хязгааргүй шүдний эмч нарын холбоо”-ноос нийт 64 сая төгрөгийн өртөг бүхий зөөврийн шүдний эмнэлгийн 15 сандал, 4 бор машин, шүдний багажнууд, нэг удаагийн хэрэглэгдэхүүн зэргийг хандивлалаа. Зөөврийн эмнэлгийг хүлээлгэн өгөх арга хэмжээнд Нийслэлийн эрүүл мэндийн газрын Эмнэлгийн тусламжийн хэлтсийн дарга М.Мөнхдэлгэр, “Хил хязгааргүй шүдний эмч нарын холбоо”-ны гүйцэтгэх захирал М.Туул, нийслэлийн Шүд, эрүү, нүүрний төвийн захирал Л.Хэнтий нар оролцсон юм. Монгол Улсад сүүлийн жилүүдэд тулгамдаж байгаа боловч олны анхаарлын төвд төдийлөн орж чадахгүй байгаа шүдний өвчлөлийг бууруулах, нэн ялангуяа хот суурин газраас алслагдсан хөдөө, орон нутагт мэргэжлийн тусламж, үйлчилгээг чанартай үзүүлэхэд тус хандив нь чухал үүрэг гүйцэтгэх талаар эмнэлгийн удирдлагууд хэлж байлаа гэж нийслэлийн Эрүүл мэндийн газраас мэдээллээ.
