Монгол бөхийг Гиннесийн дээд амжилтад бүртгэгдсэн өдөр, “Безкон Аудит” компаний 15 жилийн ойн нэрэмжит намрын улирлын нээлтийн барилдаан Ням гарагт “Монгол бөхийн өргөө”-нд явагдлаа. Улсын арслан Р.Пүрэвдагва, улсын заан Н.Жаргалбаяр, улсын харцага Ш.Уламбаяр, Д.Бат-Эрдэнэ нараар ахлуулсан 240 бөх барилдаж Ховд аймгийн Буянт сумын харьяат улсын харцага О.Хангай түрүүлж, Дорнод аймгийн Дашбалбар сумын харьяат улсын начин Д.Анар үзүүрлэсэн байна.
Их шөвөгт Булган аймгийн Могод сумын харьяат аймгийн заан Э.Энх-Амгалан, Архангай аймгийн Батцэнгэл сумын харьяат аймгийн харцага Б.Зоригтбаатар нар шалгарсан. Барилдааны зүүний манлай улсын арслан Р.Пүрэвдагва зургаагийн даваанд улсын начин Д.Анарыг хүлээн авч хөмрүүлж унасан бол шинэ заан Н.Жаргалбаяр аймгийн заан Э.Энх-Амгаланд дунгуйлдуудж татуулаад өвдөг шороодсон байна.
Дараагийн барилдаан энэ сарын 23-нд болох юм.
О.ДАШНЯМ