“Монголын Хөлбөмбөгийн Холбооны цом”-ын тэмцээний хагас шигшээгийн эхний тоглолт “Улаанбаатар сити” болон “Эрчим” багуудын хооронд явагдлаа. “Хүрхрээ үндэсний лиг”-ийн аваргын цомыг гурав дахь жилдээ дараалан өргөх эрхтэй болсон “Эрчим”, анх удаа медалийн болзол хангасан “Улаанбаатар сити” багуудын тоглолт 90 минутын турш тун өрсөлдөөнтэй явагдсан.
Эхний хагаст хуурай тэнцсэн багууд шийдвэрлэх үеийн сүүл хүртэл гоолгүй тэмцэлдсэний эцэст 85 дахь минутад “Улаанбаатар сити” клубийн тоглогч Н.Цэдэнбал энэ тоглолтын хувь заяаг шийдсэн гоолыг оруулав. Үндсэн цагт 1:0-ээр хожсон “Улаанбаатар сити” анх удаа “МХБХ-ны цом”-ын аваргын төлөө тоглох эрхтэй боллоо.
Өнгөрсөн жил тэмцээний хагас шигшээд Эрдэнэтийн “Хангарьд”-д хожигдож байсан “Улаанбаатар сити” аваргын төлөө 10 сарын 08-нд “Эф Си Улаанбаатар”, “Дэрэн” багуудын хожсонтой тоглоно. Тэдний өрсөлдөгчийг тодруулах “Эф Си Улаанбаатар”, “Дэрэн” багуудын тоглолт өнөөдөр МХБХ-ны цэнгэлдэх хүрээлэнд явагдана.