“Монголын үндэсний бөхийн холбоо”-Ноос бөхчүүдийн намрын улирлын чансааг шинээр гаргалаа. Чансааг 2017 оны сар шинийн баярын барилдаанаас өнгөрсөн Ням гарагт болсон Эрчим хүчний 95 жилийн ойн хооронд болсон нийт 15 барилдааны амжилтыг харгалзаж гаргажээ. Энэхүү чансааг Ховд аймгийн Буянт сумын харьяат улсын харцага О.Хангай 17621 оноогоор тэргүүлсэн байна. Тэрбээр 15 барилдааны есөн барилдаанд зодоглож Аваргуудын нэрэмжит барилдаан болон намрын улирлын нээлтийн барилдаанд түрүүлсэн юм.
Чансааны дэд байрт Увс аймгийн Улаангом сумын харьяат улсын гарди Ө.Бат-Орших 15833 оноотой жагссан байна. Ө.Бат-Орших гарди зургаан барилдаанд зодоглохдоо л энэ оноог цуглуулсан байна.
Чансааны эхний арван байрт Улсын заан Н.Жаргалбаяр, улсын арслан Н.Батсуурь, улсын харцага Б.Бат-Өлзий, улсын арслан Ц.Содномдорж, улсын арслан Р.Пүрэвдагва, улсын заан Б.Пүрэвсайхан, улсын начин Ч.Хөхчирэнгэр, улсын өсөх идэр начин Э.Энхбат нар жагссан байна.
Сонирхуулахад улсын аварга Ч.Санжаадамба 19 дүгээрт, улсын аварга Г.Эрхэмбаяр 26 дугаарт, улсын арслан П.Бүрэнтөгс 25 дугаарт бичигдсэн юм.
Энэхүү чансааны эхний 128-д эрэмбэлэгдсэн бөхчүүд ирэх Ням гарагт болох “Баянзүрх хайрханы хишиг” барилдаанд зодоглох юм.
О.ДАШНЯМ
