УНТЭ-ийн энэ жилийн резидент эмч нарт гэрчилгээ гардуулах ёслолын арга хэмжээ өчигдөр тус эмнэлгийн хурлын танхимд амжилттай болж өндөрлөлөө.
Тус арга хэмжээнд УНТЭ-ийн захирал Б.Бямбадорж, Эмнэлзүй эрхэлсэн дэд захирал Д.Чулуунбаатар, Цусны эмгэг судлал, чөмөг шижлүүлэн суулгах төвийн эрхлэгч, их эмч Н.Оюундэлгэр, Элэг шилжүүлэн суулгах багийн ахлагч, Хүний гавьяат эмч О.Сэргэлэн, Сувилахуй эрхэлсэн албаны дарга Ц.Амаржаргал болон тэргүүлэх, зөвлөх багш, эмч нар оролцлоо.
УНТЭ-ийн захирал Б.Бямбадорж хэлсэн үгэндээ “Монгол Улсын хүн амын эрүүл мэндийг сахин хамгаалах ариун үйлсэд нэгдэж байгаа залуу эмч нартаа УНТЭ-ийн нийт хамт олны өмнөөс болон хувиасаа чин сэтгэлийн халуун баяр хүргэе. Та бүхэн маань сургагч багш, эмч нарынхаа арвин эрдэм мэдлэг, ажлын баялаг туршлага, хөдөлмөрч зан чанар, хүний төлөө гэсэн эерүү зөөлөн сэтгэл, харилцааны нандин чанарыг нь өвлөн авч, зон олныхоо итгэлийг хүлээсэн “САЙН ЭМЧ” болно гэдэгт миний бие итгэлтэй байна” хэмээлээ.
Энэ жил УНТЭ-т мэс засал судлал 8, мэдрэлийн эмгэг судлал 6, дотор судлал 16, яаралтай тусламж судлал 6, эрчимт эмчилгээ 4, мэдээгүйжүүлэлт судлал 12, чих хамар хоолой 3, эмнэлзүйн эмгэг судлал 3, нүд судлал 4, дүрс оношилгоогоор 7 нийт 67 резидент эмч амжилттай төгсөж, ажлын гараагаа эхлэж байна.
Дашрамд дурдахад УНТЭ нь 2000 оноос эхлэн бие даан Эмнэлгийн мэргэжилтний төгсөлтийн дараах давтан сургалтыг явуулж эхэлсэн аж. Харин 2016 оноос “Сургалтын эмнэлэг” болон өргөжиснөөр эмнэлэгийн дадлагад суурилсан сургалтын төв бааз суурь болон хөгжиж, өнөөгийн Монгол орны өнцөг булан бүрт ажиллах чадварлаг эмч нарыг бэлтгэхэд томоохон үүрэг гүйцэтгэж байгаа юм.
