Олон улсын сагсан бөмбөгийн холбооноос зохион байгуулсан Ази тивийн аварга шалгаруулах тэмцээнд Монголын 3x3 сагсан бөмбөгийн эрэгтэй шигшээ баг амжилттай оролцож нутаг дээрээ аваргалсан билээ. Тэгвэл өнөөдөр багийн төрлөөр анх удаагаа Азийн аварга болж түүх бүтээсэн баг тамирчдыг МҮОХ-ны удирдах зөвлөл хүлээн авч баяр хүргэсэн юм.
Ингээд Үндэсний шигшээ багын дасгалжуулагч С.Тулгыг "Олимпийн Алдар" одонгоор шагнасан бөгөөд тамирчдад их ачааллын дараа сэргээх Vitargo уураг гардууллаа. Энэ үеэр МҮОХ-ны дэд ерөнхийлөгч Ц.Дамдин, ЕНБД Э.Бадар-Ууган нар монголын сагсчидаа дэмжин ажиллана гэдгээ илэрхийлсэн юм.
Манай тамирчид энэхүү азийн аварга болсноор 2018 оны 6-р сард Филипин улсын Манила хотноо болох Дэлхийн аварга шалгаруулах тэмцээнд оролцох эрхтэй болж байгаа билээ. Олимпийн хөтөлбөрт багтсан 3x3 төрөлд Монголын сагсчид цаашид амжилт гаргах боломж байгааг сүүлийн хоёр жилийн хугацаанд үзүүлсэн амжилтын цувралаас харж болно.
Тамирчиддаа хүлээн авч сэтгэлийн дэм өгсөн МҮОХ-ны дэд ерөнхийлөгч Ц.Дамдин, ЕНБД Э.Бадар-Ууган нарт нийт сагсчидын өмнөөс баярласан талархсанаа илэрхийлэхийн ялдамд МҮОХ-ны цаашдын ажил үйлсэд амжилт хүсье.