Азийн 19 хүртэлх насны АШТ-ний эрхийн төлөөх тэмцээний “I” хэсгийн тоглолтууд өчигдөр МХБХ-ны цэнгэлдэх хүрээлэнд явагдлаа.
Эхний тоглолт 12:00 цагаас Тайланд, Сингапурын багуудын хооронд болоход Тайланд 3:1-ээр хожсон. Үндсэн цаг эхлээд 39 секундийн дотор тоог нээж чадсан Тайландын баг тэргүүллээ хадгалж чадсаны ачаар эхний тоглолтоос гурван оноо авч чадлаа.
Харин Монголын шигшээ баг тивдээ төдийгүй дэлхийд данстай Японы багтай тоглож 7:0-ээр хожигдлоо. Хэсгийнхээ хамгийн хүчирхэг багтай эхний тоглолтоо хийсэн манай залуус үлдсэн хоёр учраа багаасаа эерэг үр дүн авч чадвал АШТ-ний эрх авч чадна. Урьд өмнө нь Монголын 23 хүртэлх насны шигшээ баг Сингапур /2:2/, Тайландын /1:1/ багуудтай тэнцэж байсан удаатай.
Хэдийгээр 19 насны шигшээ багаараа анх удаа тоглох гэж байгаа ч манай залууст боломж байгаа гэдэгт эргэлзэх зүйлгүй. Манай баг 11 сарын 06 –нд Тайландтай, 11 сарын 08-нд Сингапуртай тус тус 16:00 цагаас тоглоно. Үзэгч та бүхэн МХБХ-ны цэнгэлдэх хүрээлэнд хүрэлцэн ирж “Талын хөх чононууд”-аа уухайлан дэмжээрэй.
Эх сурвалж : МХБХ
