Монголын Ширээний Теннисний Холбоо, Нийслэлийн Биеийн Тамирын Хороотой хамтран ширээний теннисний УЛААНБААТАР ОПЕН тэмцээнийг зохиож байна. Тэмцээн ширээний теннисний "Оч" клуб, Спортын Төв Ордонд энэ сарын 16-17-ны өдрүүдэд болох юм байна.
Залуучууд-насанд хүрэгчид, өсвөр нас гэсэн хоёр ангилалтай. Залуучууд ангилал нь насны хязгааргүй. Нэгбүрчилэн болон холимог багийн төрлөөр өрсөлдөнө. Энэ төрөлд ахмадаас улсын удаагийн аварга том Баярмагнай, Бэгз, залуучуудаас Чулуудай, Эгшиглэн нарын шилдгүүд хүч сорино. Эмэгтэйчүүдэд улсын аварга Дэлгэрмаа, улсын аваргын мөнгө хүрэл медальт Должинзуу, Ундрам, Болор нам өрсөлдөнө.
Өсвөр насны ангилал нь ганцхан нэгбүрчилсэн төрлөөр болно. 15-аас доош насны теннисчид оролцох юм гэж Монголын Ширээний Теннисний Холбооны ерөнхийлөгч Гантулга мэдээллээ.
Улаанбаатар опен тэмцээнийг энэ жилээс сэргээж байна. Цаашдаа жил бүр уламжлал болгон зохиохоор төлөвлөж байна. Зөвхөн Улаанбаатарын 9 дүүрэг төдийгүй, 21 аймаг, Дархан, Эрдэнэтийн теннисчид өргөнөөр оролцох болсон. Алсдаа олон улсын тэмцээн болж ч өргөжин тэлэхийг үгүйсгэхгүй. Тэгэхийн тулд зохион байгуулалтаа улам дээшлүүлж, гол нь шагналын санг өсгөх шаардлагатай. Улсын аварга шалгаруулах тэмцээн, Цомын аварга, Лигийн аварга шалгаруулах тэмцээний ард эрэмблэгдэх нэгэн том тэмцээнийг шинээр бий болгож байгаагаараа ихээхэн ач холбогдолтой гэж тус холбооны ерөнхий нарийн бичгийн дарга С.Галбадрах тодотголоо.
Э.ОТГОНЖАРГАЛ
