Хөлбөмбөгийн хорхойтнуудын сэтгэлийг гонсойлгосон үйл явдал болов. Дэлхийн 4 удаагийн аварга Италийн баг Орос орныг зорих эрхээ хасуулав. Эрхийн төлөөх нэмэлт 2 тоглолтонд ч гоолдож чадсангүй. Сүүлчийн хоёр тоглолтын нийлбэр дүнгээр Шведэд 1:0 -ээр арчаагүй хожигдсоноор шүүмжлэлийн бай болов. " Ялзарсан өндөг, цоорхой оймс, хамраа сөхсөн галуунууд, дураараа гахай, чадваргүй новшгүй" гэх зэргээр тэднийг дуудан хэвлэлд бичиж эхэллээ. Дасгалжуулагч, хаалгач, тоглогчдыг нь бүгдийг нь шигшээгээс хөөн зайлуулбал таарна ч гэж фанатууд нь давшилж байна. Хамгийн түрүүнд 69 настай Жан Перо Вентура гэгч бүдүүн гахайг хөөн зайлуул гэж шахаж эхлэв.
4 удаагийн аварга, сүүлийн 60 жил ХДАШТ-д алгасалгүй оролцож ирсэн Аззура-г ДАШТ-д оролцуулж чадаагүй дасгалжуулагч Вентура ч алдаагаа хүлээн зөвшөөрөхгүй байгаа нь италичуудын зэвүүцлийг улам төрүүлж байна. "Бид 2 жилд ердөө л 2 хожигдсон. Испани, Францад л 3:0 -ээр хожигдож байсан. Бусад тохиолдолд сайн байсан" гэж Телевизийн ярилцлагад оролцохдоо хэлсэн нь ийнхүү уур хилэнг дэврээжээ. Түүний орны хүнийг ч хайж эхэлжээ.
Байер Мюнхений дасгалжуулагчаар ажиллаж байсан Анчелотти, Челсигийн Конти, Манчестер Ситиг удирдаж байсан Манчини нарын нэр дурдагдаж эхэлсэн байна. Ямар ч гэсэн 2018 оны 6-р сарын 1-нийг хүртэл гэрээний дагуу цалинг нь Вентурад олгоно гэдгээ Италийн Хөлбөмбөгийн Холбооны ерөнхийлөгч, 74 настай Тавеччио мэдэгдлээ. Түүний сарын цалин( 943 мянган ам.доллар) юм байна. -Бид шигшээ багаа бүрэн шинэчилнэ. Бүр анхан шатнаас нь гэж Тавеччио нэмж хэлсэн байна. Ийнхүү 60 жилийн турш, 15 дэлхийн аваргад дараалан оролцож, түүнийхээ 4-д нь түрүүлж, цом өргөж байсан Италичууд пүүзээ тайлан үзэгчдийн суудалд шилжлээ.