МХБХ-ны 2017-18 оны улирлын “Футзалын дээд лиг” энэ Ням гарагт буюу 12-р сарын 03-ны өдөр МХБХ-ны футзалын ордонд эхэлнэ. Тэмцээний техникийн зөвлөгөөн МХБХ-ны байранд боллоо. “Футзалын дээд лиг”-т оролцох Унаганууд, Дэрэн, УБ Мазаалайнууд, Хангарьд, Атлетик 220, Хоромхон, Сэлэнгэпресс, Соёмбын барсууд, Арвис, Гоёо Эф Си багуудын төлөөлөл техникийн зөвлөгөөнд хүрэлцэн ирж, тэмцээний дүрэм журамтай танилцлаа.
Энэ жилийн тэмцээний томоохон онцлог нь “Футзалын дээд лиг” анх удаа 2 тойргоор явагдах юм. Өөрөөр хэлбэл баг тус бүр 18 тоглолт хийнэ гэсэн үг. Хуваарийн дагуу тэмцээн 12-р сарын 3-наас ирэх оны 3-р сарын 31-ний өдөр хүртэл үргэлжилнэ.
Гэхдээ шинэ улирал 2 долоо хоног хойшилж эхэлж буйтай холбогдуулан улирлын дундуур ажлын өдрүүдэд 10 тоглолт болно. Мөн Хангарьд клуб Эрдэнэт хотоос ирж оролцдогийг харгалзан, тэд 2 долоо хоногт нэг удаа Улаанбаатарт ирж тоглохыг бусад багууд хүлээн зөвшөөрчээ.
Эхний 7 хоногийн тоглолтуудын хуваарь:
12.03 – 10:00 Унаганууд – Соёмбын барсууд
12.03 – 12:00 УБ Мазаалайнууд – Дэрэн
12.03 – 14:00 Сэлэнгэпресс – Хоромхон
12.03 – 16:00 Гоёо Эф Си – Атлетик 220
12.09 – 10:00 Арвис – Хангарьд
