Монголын Үндэсний олимпийн хорооны тэргүүн дээд “Бөртэ Чоно-2017”-д шилдэг дасгалжуулагчид чөлөөт бөхийн төрлөөс дөрвөн хүн нэр дэвшсэнээс Зэвсэгт хүчний “Алдар” спорт хорооны дасгалжуулагч, гавьяат дасгалжуулагч Цэрэнбаатарын Хосбаяр шилдгийн шилдэг дасгалжуулагчаар хоёр дахь удаагаа тодров.
Тэрбээр 2014 онд шилдэг дасгалжуулагчаар тодорч байсан юм. Түүний шавь нараас нь 2017 онд Парисын насанд хүрэгчдийн ДАШТ-ээс П.Орхон алт, “U-23”-ын ДАШТ-ээс Г.Отгонжаргал хүрэл, залуучуудын ДАШТ-ээс Б.Болор-Эрдэнэ хүрэл, Литвад болсон цэргийн ДАШТ-ээс хоёр алт, дөрвөн хүрэл медаль хүртсэн бөгөөд дээрх амжилтаар оны шилдэг дасгалжуулагчаар тодорчээ.
Ц.Хосбаярын адил ардын багш, гавьяат дасгалжуулагч Ч.Дамдиншарав 2001, 2002, Б.Баттулга 2005, 2007, түүний дүү гавьяат тамирчин Ц.Цогтбаяр 2014, 2015 онд шилдэг дасгалжуулагчаар хоёр удаа тодорч байв. Харин чөлөөт бөхийн түүхэнд гавьяат тамирчин, гавьяат дасгалжуулагч З.Дүвчин 2010, 2012, 2013, 2015 онд дөрвөн удаа шилдэг дасгалжуулагчаар тодорч байсан нь дээд амжилт юм.
МЧБХолбоо