Монгол теннисчин тив, дэлхийн аваргын медальд хамгийн ойр очсон тохиолдол Японы Яйзу хотод энэ сарын эхээр зохиогдсон Ази Тивийн Ширээний Теннисний аварга шалгаруулах тэмцээний үеэр бүртгэгдлээ. Яйзу хот нь Токио, Нагоя хотын тэг дунд, Монголын чөлөөт, жудо, парагийн тамирчид бэлтгэлээ базаах гэрээтэй Шизока мужид оршдог юм байна гэж тус тэмцээнд оролцсон Баяржин тодотголоо.
Нийт 800 гаруй теннисчид 40, 50, 60, 70, 80 насны ангилалд өрсөлдсөнөөс Монголчууд 40, 50, 60 насны ангилалд оролцов.
Эрэгтэйчүүдийг ОУХМ, улсын 3 удаагийн аварга, 11 удаа финалдсан С.Галбадрах ахалж дэд мастер Баяржин, Ариунбаатар, Дөлбадрах, Зоригоо, Чинбаатар, Пүрэвээ, Өлзий, эмэгтэйчүүдийг улсын аварга Наранцацралт, мастер Сэргэлэн, дэд мастер Сарантуяа, Нарантуяа, Энхжаргал, Наран нар төлөөлөв.
Нийтдээ 48 ширээ эгнүүлэн зассан спортын том цогцолборт сумогийн их аварга Даваажаргал болон монголын пара олимпийн тамирчдын зургийг хананд байрлуулсан нь дотно харагдаж байлаа гэж тус тэмцээний 60 насны ангилалд хүч, хурдаа сорьсон Сэргэлэн онцоллоо. "Галаагаа медальд хүрчихлээ л гэж бодсон. Хэсгээсээ 1-ээр гарч, нэг гоц мөргөөд, дараагийн даваанд Монголынхоо Баяржинг, улмаар 2 японыг унагаж, медалийн төлөө гурав дахь японтойгоо таарсан байсан. Эхний партыг 11:4, хоёрдахийг нь илүүрхэж 8:6 -аар хожиж явсан. Ингээд л Азийн аваргаас медальтай, баяртай буцах нь л гэж санасан. Харамсалтай нь илүүрхэж явсан хоёрдахь партиа алдсанаас болж тоглолт эргэсэн. Япон тоглогч бүрэн сэргэсэн. Ингээд л дараалан 3 хожигдсоноор хүрэл медалиа харамсалтайгаар алдсан" гэж тус тэмцээнд оролцсон Ариунбаатар С.Галбадрахын тоглолтыг дүгнэж хэлэв.
"Харамсалтай юм болсон. Сайн сайн япончуудтай ойр ойрхон угсран тоглосноос цуцсан нь нөлөөлчих шиг болсон. Өмнөхөөсөө арай сулхан япон байсан. Илүүрхэж явснаа л алдчихсан. Тун харамсалтай. Уул нь тивийн анхны медалиа эх орондоо авчирчих хүсэл тэмүүлэл их байлаа" гэж С.Галбадрах сэтгэгдлээсээ хуваалцав.
Ахмадын тэмцээнд сайн бэлдэж оролцвол медальт байранд шалгарах бололцоо байгааг ОУХМ Галбадрах маань ийнхүү үзүүлсэн байна.
Э.БАДРАХ
