Монголын Ширээний Теннисний Холбоо топ теннисчидийнхээ чансааг сорих зорилгоор бооцоот тэмцээн зохион байгууллаа. - Хамгийн гол нь энэ жил хоёр залуу тамирчныг Холбооноос зохион байгуулж гадаадад сургасан. Ч.Эрдэнэбаярыг Солонгос улсад 30 хоног шигшээ багт нь бэлдүүлсэн бол Мөнхзоригийг Хятад улсад удаан хугацааны сургалтад хамруулсан. Аль аль нь нутагтаа ирсэн завшааныг ашиглаж үлдсэнтэй нь сорьж, тэдний хэр өссөнийг харах зорилготой энэхүү бооцоот тэмцээнийг хийлээ гэж дүгнэж болохоор байв. Холбооны ерөнхийлөгч Гантулга ч тоглолтыг эхнээс нь дуустал үзлээ.
Тэмцээнд улсын 4 удаагийн аварга Э.Лхагвасүрэн, хошой аварга Б.Билэгт нараас бусад нь оролцсон. ( Лхагвасүрэн АНУ-ыг зорьсон, Билэгт ажил давхацсан байна) Улсын хошой аварга Баярмагнай, Бэгз, улсын аварга Энхсайхан, улсын аваргын мөнгөн медальт спортын мастер Эрдэнэбаяр, улсын аваргын хүрэл медальт дэд мастер Чулуудай, Батдэлгэр болон дэд мастер Мөнхзориг, Чинзориг, Баатарсайхан, Ариунболд, жижиг Баярмагнай, Лхагва-Эрдэнэ нар гурван хэсэгт хуваагдаж тоглосон. Хэсгээс Я.Бэгз, Ч.Эрдэнэбаяр, Лхагва-Эрдэнэ нар нэгээр гарч, хоёроор гарсан Баярмагнай, Чинзориг, Ариунболд нарыг сугласан. Ч.Эрдэнэбаяр 3:1 Баярмагнай, Я.Бэгз 3:1 Чинзориг, Лхагва -Эрдэнэ 3:0 Ариунболдыг тус тус хожсоноор аваргын төлөө тойргоор тоглов. Лхагва-Эрдэнэ хоёуланд нь хожигдож, Эрдэнэбаяр 3:2 Бэгзийг буулган авснаар энэ оны хамгийн төгсгөлийн бооцоот тэмцээнд өнгөлж, 400,000 төгрөгийн шагнал хүртлээ. Хүлээж байснаас Мөнхзориг тааруу тоглож, хэсгээсээ ч шалгарч чадсангүй. Шалтгаан нь, урд хөршид Ниттаки бөмбөгөөр дасгал хийдэг, ниттакигаар тэмцээнд тоглодог бол Юнхее бөмбөгөөр анх удаа тоглосон нь тоглолтыг нь эвдсэн байх магадлалтай гэж теннис сонирхогчид дүгнэв.
Эрдэнэбаярын хувьд эрс өссөн, хурд, хүч, техникээр бусдыгаа илүүрхэж хожлоо гэж тэмцээнийг сонирхсон Мэргэн дасгалжуулагч дүгнэлт хийв. Ийнхүү топуудын дундах бооцоот тэмцээн өндөрлөж, өнөөдөр нийт теннисчид шинэ жилийн цэнгүүнээ хийнэ.
Э.ОТГОНЖАРГАЛ