УИХ-ын даргын ивээл дор зохион байгуулдаг шатар сонирхогчдын Улсын аварга шалгаруулах шигшээ тэмцээн өндөрлөж, аваргуудаа тодрууллаа.
Нийт 120 гаруй шатарчин оролцсоноос эрэгтэй ангилалд Хэнтий аймгийн Батширээт сумын Г.Амарсанаа түрүүлж, МУИС-ийн оролцогч Г.Бат-Эрдэнэ дэд байр, УИХ-ын гишүүний туслах Н.Галцог гуравдугаар байр эзэллээ.
Харин эмэгтэй ангилалд Дорноговь аймгийн шатарчин Э.Одгэрэл алт, Нийслэлийн БЗД-ийн Д.Цээсүрэн мөнгө, Өмнөговь аймгийн Э.Мөнх-Амгалан хүрэл медаль хүртэв.
Эмэгтэй ахмад шатарчны тусгай шагналыг 63 настай М.Жаргалсайхан хүртсэн бол эрэгтэй тусгай шагналын эзнээр 66 настай Б.Дүүрэнбаяр тодорлоо.
Тэмцээний хаалтын үйл ажиллагаанд УИХ-ын Тамгын газрын Захиргаа, аж ахуйн асуудал хариуцсан нарийн бичгийн дарга П.Цэрэн, Тэмцээний ерөнхий шүүгч, ОУ-ын шүүгч Г.Алтан-Оч, МШХ-ны Гүйцэтгэх захирал Ц.Цогбаяр, Б.Наранбаатар, Дэд ерөнхийлөгч Б.Баярмагнай, МШХ-ны дэд ерөнхийлөгч, тэмцээн зохион байгуулах хорооны дарга Г.Даваахүү нар оролцож, нийт шатарчиддаа баяр хүргэв.
Энэ жил эхний гурван байр эзэлсэн эрэгтэй, эмэгтэй шатарчдад “Дэд мастер”-ын цол олгохоор боллоо. Мөн энэхүү цолыг олгохоос гадна эрэгтэй, эмэгтэй аваргуудад шатар сонирхогчдын Ази тивийн аварга шалгаруулах тэмцээнд оролцох эрх олгож, тэмцээнд явах зардлыг зохион байгуулагч хариуцах юм.
Д.НЯМАА