Чикаго Буллс баг Испани довтлогч Никола Миротичийг солилцоонд оруулахаар төлөвлөж байгаа ажээ. Түүнтэй байгуулсан гэрээ нэгдүэгээр сарын 15-нд дуусах бөгөөд өөрийнх зөвшөөрөлгүй солилцоонд оруулах боломжгүй юм.
Өнгөрсөн аравдугаар сард багийн довтлогч Бобби Портистой үүсгэсэн маргаанаас хойш түүний нэр солилцоонд орох хамгийн эхний нэр болон яригдаж эхэлсэн. Тэр үед үүссэн маргаанаас болж Бобби Портис найман тоглолтоор торгуулсан бол Никола Миротич нүүрэндээ авсан бэртлийн улмаас улирлын эхний 23 тоглолтыг өнжсөн билээ. Гэвч бэртлээс эргэн ирснийхээ дараа Миротич 17.4 оноо, 7.0 самбараас бөмбөг авалт дунджилж, сэлгээнээс багтаа хамгийн их ашиг тусыг өгч байгаа билээ. Миротич ирэх улиралд гэрээ ёсоор $12.5 сая долларын цалин авна. Хэдийгээр цалиндаа хүрсэн сайн тоглолт үзүүлж байгаа ч багийн ирээдүйд тооцогдож байгаа Зак Лавиныг авч үлдэхийг хүсвэл эртнээс цалингийн цэсээ сулласан нь зөв шийдвэр болно гэж аналистууд үзэж байна.
Д.НЯМАА
