2017 оны дэлхийн аварга, цэргийн дэлхийн аварга, “Алдар” спорт хорооны тамирчин, Пүрэвдоржийн Орхон “Бага дэлхийн аварга” хэмээгддэг Иван Ярыгиний нэрэмжит “Алтан Гранпри”-д сүүлийн гурван жил дараалан түрүүллээ.
Энэ жил 62 кг-ийн жинд хүч үзэж эхний даваанд спортын мастер Х.Болортуяаг оноогоор цэвэр, шөвгийн наймд БНХАУ-ын Кан Яныг цэвэр, хагас шигшээд өнгөрсөн жилийн финалд ялж байсан эзэн орны Инна Тражуковаг 10:8-аар, шигшээ барилдаанд Японы Кива Сакаег оноогоор цэвэр ялснаар төрийн дууллаа эгшиглүүлсэн юм.
Монголын бөхчүүд Ярыгины нэрэмжит тэмцээнээс 12 алтан медаль хүртсэн бөгөөд гурав нь П.Орхоны нэр дээр бичигдэж байна.
Азийн аварын мөнгөн медалт ОУХМ Э.Гантуяа мөнгө, ОУХМ Ц.Цогтбаатар, Б.Батмагнай, Н.Золбоо, М.Лхагвагэрэл нар хүрэл медаль зүүжээ.
Д.НЯМАА