Хүн төрөлхтний спортын их баяр наадам "Пёнчан-2018" Өвлийн XXIII олимпийн наадам өчигдөр 19:00 цагт нээлтээ хийж оролцогч 91 орны төрийн далбаа БНСУ-ын тэнгэр дор мандлаа.
Өмнөд Солонгосчууд “цагаан” олимпийг зохион байгуулах эрхийн төлөө 2003 болон 2007 оны ОУОХ-ны санал асуулгад нэр дэвшиж байсан ч удаа дараа бүтэлгүйтэж байв. Гэсэн хэдий ч Өмнөдүүд бууж өгөөгүй, 3 дахь удаагаа буюу 2011 онд Өмнөд Африкийн Дурбан хотноо болсон ОУОХ-ны 123-р их хурлаар дахин нэрээ дэвшүүлж нийт гишүүдийн талаас их хувийн саналыг хүртсэнээр Өвлийн XXIII Олимпийн наадмыг зохион байгуулах эрхийг олж авсан юм. Ийнхүү Өмнөд Солонгос Өвөл болон Зуны Олимпийн наадмыг хоёуланг нь хүлээн авсан 8 дахь, Азийн 2 дахь улс болов.
Эртний Грекийн домогт өгүүлснээр Прометей галын бурхан нь Зевс бурхнаас гал хулгайлан хүмүүст хүртээж, амьдрал бэлэглэсэн аж. Үүнийг баяр болгон тэмдэглэсэн нь эртний Олимпийн наадам дахь галт бамбар юм. Өдгөө энэхүү гал нь Грекийн Олимп уулан дахь Хестиагийн сүмд мөнх бадамлан асаж байдаг байна. Чухам энэ газраас олимпийн бамбарын буухиа эхэлж олимпийн наадам зохион байгуулах газарт хүрдэг аж.
Пёнчан-2018 Олимпийн наадмын бамбар өнгөрсөн оны 11 дүгээр сарын 01-ний өдөр Грекийн "Олимп" уулнаас Инчон хотын нисэх онгоцны буудалд бууснаар буухиа эхэлж нийт 7500 гаруй хүмүүс оролцон БНСУ-ын ихэнх хотоор 101 хоногийн турш 2018 км замыг туулан өчигдөр Пёнчан олимпийн цэнгэлдэх хүрээлэнд бадамлан асав.
Бамбарын буухианд Олимпийн түүхэнд анх удаа "РОБОТ" оролцов. "ХЮБО" нэрт энэхүү робот нь БНСУ-ын Шинжлэх ухаан, Технологийн Их Сургууль(КАИСТ)-ийн баг зохион бүтээж, 2015 онд Дэлхийн "Гамшгаас Хамгаалах Робот" тэмцээнд түрүүлсэн аж.
Өчигдөр бамбарын буухиаг эцэслэж, БНСУ-ын уран гулгалтын "Хатан хаан" Олимпийн алт, мөнгөн медальт, Дэлхийн хошой аварга Ким Юна мөсөн дундаас гал өргөж, бамбар бадамлуулснаар "Пёнчан-2018" Өвлийн XXIII олимпийн наадам эхлэв.
Олимпийн нээлтийн ёслолд үзүүлсэн тэнгэрт гэрэлтэх энэхүү таван цагираг нь ямар нэгэн "компютерийн засвар" орсон бичлэг биш аж. Харин 1218 ширхэг нисдэг бичил "Дрон" ашигласан ажээ. Энэхүү гайхамшигт үзүүлбэр нь Дэлхийн "Гиннэсс"-ийн шинэ амжилт болон тэмдэглэгдэв.
Эх сурвалж : МҮОХ