“Бишкек-2018” чөлөөт бөхийн Азийн АШТ-ний эхний өдөр эмэгтэйчүүдийн 50, 55, 59, 68, 76 кг-ын жингийн урьдчилсан барилдаан болж, медалийн төлөө барилдах бөхчүүдийн нэр тодорлоо.
68 кг-ын жинд Азийн аваргын мөнгөн медальт Шархүүгийн Түмэнцэцэг эзэн орны Меерим Жуманазароваг хагас шигшээд 2:2-оор ялж алтан медалийн төлөө барилдахаар болжээ. Харин ОУХМ Э.Нарангэрэл Э.Даваачимэг, Б.Шоовдор, А.Чанцалнямаа нар хүрэл медалийн төлөө барилдах эрх аваад байна.
50 кг-д Эрдэнэсүхийн Нарангэрэл БНХАУ-ын Лэй Чунд, 59 кг-д Баатаржавын Шоовдор БНХАУ-ын Рон Ниннинд оноогоор цэвэр, 55 кг-д Эрхэмбаярын Даваачимэг Японы Саки Игарашид 0:3-аар хагас шигшээд хожигдсон юм.
76 кг-д А.Чанцалнямааг ялсан Хятадын бөх шигшээд шалгарснаар хүрэл медалийн төлөө "Рио-2016" олимпийн наадмын хүрэл медальт, Казахстаны Эльмира Сыздыковатай барилдахаар болсон байна.
Д.НЯМАА
