Монголын Үндэсний бөхийн холбооны наймдугаар “Их Эе” өнгөрсөн бямба гарагт Монгол бөхийн өргөөнд хуралдсан. Хурлаар Монголын Үндэсний бөхийн холбоог 28 жилийн турш удирдсан тэргүүн Р.Нямдорж, дэд тэргүүн Д.Данзан нар ажлаа хүлээлгэн өгч бүр Цэцдийн зөвлөлөөс нэрээ татсан юм.
“Их Эе”-ийн төлөөлөгчид бөхийн холбооны дотоод журмыг өөрчилж орон тооны бус тэргүүнтэй болгож тэргүүнээр УИХ-ын гишүүн Б.Бат-Эрдэнийг сонгосон юм.
Харин оролцсон 154 гишүүнээс 97-г нь цэцдийн зөвлөлд нэр дэвшүүлж 67 гишүүнийг Цэцдийн зөвлөлд сонгосон. Өнөөдөр Улаанбаатар хотоос шинээр Цэцдийн зөвлөлд сонгогдсон гишүүдийн төлөөлөл болох улсын арслан Д.Ганхуяг, Д.Азжаргал, улсын гарьд И.Доржсамбуу, улсын заан Б.Сайнбаяр, улсын харцага Т.Өсөх-Ирээдүй нар мэдээлэл хийсэн юм.
Цэцдийн зөвлөлийн гишүүн улсын заан Ц.Магалжав:
“Өдрийн 11:00 цагт эхэлсэн хурал маань шөнийн 02:00 цаг хүртэл үргэлжилж олон шийдвэр гаргасан. Цаг орой болсон байсан учраас бид ярилцаад 10 хоногийн дараа Цэцдийн зөвлөл хуралдаад тэргүүлэгчдээ сонгохоор болсон. Монголчууд бүх зүйл дээр хоёр хуваагдаад байна гээд байгаа юм. Монгол бөхийн холбооны хувьд хоёр хуваагдах үндэслэл байхгүй. Тиймээс цаашдаа энэ талцал хуваагдлын тухай асуудлыг арилгая л гэж зорьж байна. Холбооны тэргүүн, дэд тэргүүн нь орон тооны бус, гүйцэтгэх захирал орон тооны байдлаар ажиллаж, аливаа шийдвэрийг тэргүүлэгчдийн зөвлөлд оруулан шийдүүлж байхаар тогтлоо. Өмнө нь бүх үйл ажиллагааг холбооны тэргүүн зохион байгуулж, шийдэж байсныг өөрчилсөн. Бүтцийн хувьд нэлээд хэдэн өөрчлөлт хийлээ" гэсэн юм.
Монголын Үндэсний Бөхийн Холбооны тэргүүнээр сонгогдсон УИХ-ын гишүүн Б.Бат-Эрдэнэ Холбооны гүйцэтгэх захирлыг санал болгох бөгөөд Цэцдийн зөвлөлийн хурлаар оруулж шийдвэрлэх юм. Цэцдийн зөвлөлийн хурлаар барилдааны дүрэм өөрчлөлт оруулах, шүүлтэд камерын бичлэг ашиглах зэрэг чухал асуудлуудыг хэлэлцэх юм байна.
С.ШҮРЭНЧИМЭГ
