Дэлхийд чансаагаараа тэргүүлдэг шилдэг 8 баг Дэлхийн цомын аваргын төлөө өрсөлддөг. Монголчууд эрэмбээрээ 11-т орж байсан ч, Дэлхийн цомд оролцох урилгыг хүлээн авсан байна. Дэлхийд эрэгтэй чөлөөтийн багийг тэргүүлэгч Ираны бөхчүүд дотоодын зөрчлөөс болоод Дэлхийн цомд оролцох боломжгүй болсон. Оросын бөхчүүдэд АНУ виз олгохгүй болсноос хүчирхэг 2 баг хасагдсан байна. Тэдний орыг залгах Азербайджан, Казахстаны баг бөхчүүдийн бэлтгэл хангалтгүй гэдэг шалтгаар мөн оролцож чадахгүй гэдгээ албан ёсоор мэдэгдсэн байна. Монголын баг 11-т жагсдаг ч, өмнөх багууд нь татгалзсан тул оролцох боломж нээгджээ. Монголын чөлөөтийнхэн энэхүү боломжийг ашиглан хамгийн шилдэг бүрэлдэхүүнээ Дэлхийн цомын аваргад илгээх болсон байна. Дэлхийн цомын аварга шалгаруулах тэмцээн 4-р сарын эхээр АНУ-ын Айво мужид болох юм байна. Сарын өмнө Японд болсон Цомын аваргаас Монголын эмэгтэй баг гуравдугаар байр эзэлж, хүрэл медаль хүртсэн амжилтыг эрэгтэйчүүд ч давтахаар зорьж байна.
Д.ЖАРГАЛ
