"М-Си-Эс Кока-Кола" ХХК-ийн ивээн тэтгэн зохион байгуулсан Монголын Хөлбөмбөгийн Холбооны футзалын дээд лигийн тэмцээн өндөрлөлөө.
С.Эрдэнэ-Очир дасгалжуулагчтай "Унаганууд" клуб футзалын дээд лигт дөрөв дараалан түрүүлэхийн зэрэгцээ нэг ч ялагдаагүй гэсэн үнэмлэхүй амжилтаа энэ удиралд ч давтлаа. Мөнгөн медалийг "Атлетик 220" хүртэж, П.Мөнхбат дасгалжуулагчийн залуус футзалын дээд лигээс анхны медалиа зүүлээ. Тэгвэл өнгөрсөн улирлын хүрэл медальт "Хоромхон" энэ улиралд ч мөн адил медалийн тавцанд гарахын төлөө хүчтэй өрсөлдөөн үзүүлж байсныхаа хүчинд, футзалын дээд лигээс хошой хүрэл медаль хүртэв.
“Унаганууд” багийн дасгалжуулагч С.Эрдэнэ-Очир болон довтлогч Э.Пүрэвдорж нар 18-р тойрогт гуравдугаар сарын шилдгүүдийн шагналаа гардан аваад байсан. Түүгээр ч зогсохгүй хаалтын үйл ажиллагааны үеэр лигийн шилдгүүдийг тодруулахад “Унаганууд"-ын М.Чанцал шилдэг хаалгач, Э.Пүрэвдорж 55 гоол оруулан шилдэг довтлогчоор шалгарлаа. Харин “Хоромхон” багийн ахлагч Х.Цэнд-Аюуш хамгаалалт, довтолгоонд жигд тоглон, багийн ноён нуруу байснаараа футзалын дээд лигийн шилдэг тэгш тоглогчийн шагналын эзэн боллоо.
2017 оны 12 сарын 03-аас эхэлсэн футзалын дээд лигийн өрсөлдөөн дуусан дуусталаа сонирхолтой өрнөж, 18-р тойрогт хүрэл медалийг хүртэх, дээд лигийг орхих багууд, лигийн мэргэн буучийн нэр тодорхой болсон юм. МХБХ энэ жил анх удаа футзалын нэгдүгээр лигийг зохион байгуулсан билээ. “Футзалын нэгдүгээр лиг”-т аваргалсан “Улаанбаатар сити”, мөнгөн медаль хүртсэн Дархан-Уул аймгийн багууд ирэх улиралд футзалын дээд лигт нэмэгдэж, өрсөлдөөнийг улам гал халуун болгох нь дамжиггүй.
(1)%20(1).JPG)
