Дорнод бүсийн хүчирхэг багуудын нэг Кавальерс ахмад тоглогч Кэндрик Пэркинстэй гэрээ байгуулсан талаар эх сурвалжууд мэдээллээ. Пэркинсийн хувьд 2017-2018 оны улиралд хөгжлийн лигт тоглож байсан юм.
Пэркинс хамгийн сүүлд 2015- 2016 оны улиралд Нью Орлеанс Пэликанс багийн бүрэлдэхүүнд 37 тоглолт хийхдээ 2.5 оноо, 3.5 самбараас бөмбөг авалт дунджилсан юм. Плэйоффт өрсөлдөх эрхээ авсан хэд хэдэн багууд түүний араас хөөцөлдсөн ч Пэркинс өөрөө Кавальерс багийг сонгосон байна.
Тэрээр 2003 оны драфтын эхний тойргийн сонголтоор НБЭ-д хөл тавьж байсан бөгөөд түүнээс хойш Сэлтикс, Тандер, Пэликанс, Кавальерс зэрэг багуудад тоглож байсан юм.
Бостон Сэлтикс багт хамгийн өндөр амжилтаа үзүүлж 2007-2008 оны улиралд НБЭ-ийн аварга гэх нэр хүндтэй цолыг хүртэж байсан билээ. Тэрээр плэйоффын 149 тоглолтонд оролцсон арвин туршлагатай тамирчин. Тиймээс Кавальерс багт түүний самбар доорх хамгаалалт, туршлага хэрэг болох нь мэдээж юм.
Д.НЯМАА
