.PNG)
10 жилийн дараа Ливерпүүл Аваргуудын Лигт шөвгөрлөө. Манчестер Ситиг ялсан Ливерпүүлийн дараагийн учраа нь Барсаг мулталсан Рома. Энэ сарын 24 -нд Лондонд, хариу тоглолт нь Рома хотод болно. -Манчестер Ситиг талбай дээр нь хожчихоод шатаар уруудаж явахад, - Барса ялагдчихлаа. Рома бидэнтэй цуг шалгарлаа гэж хэлсэн. Би тэднийг ялна гэдэгт итгээгүй ч, боломжгүй гэж бодоогүй байсан. Би тоглолтыг нь үзээгүй. Рома багийнхан тэр боломжоо ашигласан байна. Финалд үлдэх учиртай Барселона, Манчестер Сити багийг бид мулталсан. Харин бид одоо өөр хоорондоо таарлаа. Нөгөө талд агуу хоёр баг мөргөлдсөн. Миний хувьд Ромад очно. Гайхалтай, түүхэн дурсгал ихтэй хот. Гэхдээ бид амарч, зугаалахаар очихгүй. Рома бид өмнө 1984 онд буулгаж авсан байдаг түүхтэй. Гэхдээ Рома бол хүчирхэг. Ямар сайндаа хөлбөмбөгийн гигант багийг замаасаа зайлуулж байх вэ? Тиймээс бид бодолтой тоглоно. Бидний хувьд Киевд хүрэх замд хоёрхон тоглолт үлдлээ гэж Ливерпүүлийн дасгалжуулагч Юрген Клопп хэвлэлийн бага хурлын үеэр хэлэв. -Салах гоолдож, харьцаа 1:1 болох үед багаа шөвгөрлөө гэж бодов уу? Нэгдүгээр үе, хоёрдугаар үед хоёр өөр тоглолт үзүүллээ ? Гэсэн асуултанд, - Үгүй. Гоол хийсэн тохиолдолд нөхцөл огт өөрөөр эргэнэ гэдгийг залуучууддаа хэлсэн. Нэгдүгээр үеийн төгсгөлд ч тоглолтыг эргүүлж болох байсан. Манчестер Ситигийн довтолгооны шуурга их байсан. Магадгүй эхний үед олон гоол орсон бол байдал өөрөөр эргэх байсныг үгүйсгэхгүй. Гэхдээ л чи гоолдож чадахгүй бол бид гоолдоно гэдэг батлагдаагүй теором байдаг. Тэд чадаагүй. Ялангуяа Салахын гоолын дараа хамгаалалт нь сэтэрсэн. Тиймээс ч Фермино гоолдсон гэж хариулав. Клопп Английн баатар болох дээрээ тулав. Салахыг английн фенүүд нь Египтийн хаан ч гэж өргөмжлөх болов. Хэрвээ Ромаг буулган авч, финалд үлдвээс Клоппын нэр алдар мандан бадрах нь ээ.
.PNG)
Д.ЖАРГАЛ
