Казахстаны Алмата хотноо ЗХУ-ын армийн генерал Сагадат Нурмаганбетовын нэрэмжит сонирхогчийн боксын олон улсын тэмцээн болж өндөрлөлөө.
Энэ удаагийн тэмцээнд дэлхийд боксын хөгжлөөр тэргүүлэгч ОХУ, Узбекистан, Киргиз, Тажикстан, Казахстан, Монгол зэрэг улсуудын шилдэг боксчид 10 жинд нийт 128 боксчин хүчээ сорьсон юм. Эх орноо төлөөлж оролцсон Риогийн олимпийн наадмын тавдугаар байрын шагналт олон улсын хэмжээний мастер Э.Цэндбаатар 64 кг-ын жинд тулалдаж алтан медаль зүүлээ.
Тэрээр алтан медалийн төлөөх тулаанд Узбекстаны тамирчинг ялсан юм. Энэ тэмцээнд хүч үзсэн спортын дэд мастер Ц.Мөнхбаатар хүрэл медаль зүүсэн бол олон улсын хэмжээний мастер А.Нурлан тавдугаар байрт шалгарсан байна. Алматад болсон тэмцээнд оролцсон Э.Цэндбаатар, А.Нурлан, Б.Сүххуяг нар Астана хотод хамтарсан бэлтгэлд оролцохоор болжээ.
Д.НЯМАА
