Мэргэжлийн талбайн теннисний “Их дуулга” тэмцээн Францийн Парис хотод үргэлжилж байна. Энэ цагийн шилдэг тамирчид бүгд цуглаад буй “Их дуулга” тэмцээний эмэгтэйчүүдийн эхний тойргийн тоглолтууд болж өндөрлөлөө.
Эхний даваанд АНУ-ын Серена Уильямс, ОХУ-ын Мария Шарапова нарын шилдэг теннисчид өрсөлдөгчөө хожиж, хоёрдугаар тойрогт шалгарчээ. Серена Уильямс Чехийн Плишковаг хоёр сетийн тоглолтод 7:6, 6:4 –өөр буулгаж авсан.
Мөн тус тэмцээнд 25-т эрэмбэлэгдэн тоглож буй Мария Шарапова Нидерландын Хогенкамптай тоглож, 6:1, 4:6, 6:3-аар ялжээ. Нэгэн цагт дэлхийн чансааг тэргүүлж байсан тамирчид хоёрдугаар шатны өрсөлдөгчдөө хожвол гуравдугаар тойрогт хоорондоо тоглох юм. Парисын “Их Дуулга” тэмцээний хоёрдугаар шатны тоглолтууд өнөөдөр эхэлж байгаа юм. Тэмцээн зургаадугаар сарын 10-ны өдөр өндөрлөнө.
Д.НЯМАА
