Олон улсын Граунд гольфын холбооны Ази тивийн аварга шалгаруулах анхдугаар нээлттэй тэмцээн энэ сарын 29,30-нд “Чингисийн хүрээ” цогцолборт зохион байгуулна. Нийслэлийн Засаг даргын нэрэмжит тивийн аварга шалгаруулах нээлттэй тэмцээнд Австрали, Аргентин, АНУ, Шинэ Зеланд, Бразил, БНХАУ, Польш, Унгар зэрэг 12 орноос 70 гаруй тамирчид оролцох мэдүүлгээр ирүүлээд байна. Мөн Улаанбаатар хотын есөн дүүрэг, Архангай, Өвөрхангай, Орхон, Хэнтий, Булган, Увс, Ховд зэрэг 10 аймгаас шалгарсан тамирчид оролцохоор бэлтгэл сургуулилтаа базааж байгаа юм.
Монгол Улсад граунд гольфыг хөгжүүлж, бүх нийтийн хүртээл болгох зорилгоор Нийслэл, Дүүргийн ЗДТГ, Биеийн тамир спортын газар, Монголын мастеруудын биеийн тамир спортын хороо, Монголын Үндэсний Граунд гольфын холбоо энэ тэмцээнийг хамтран зохион байгуулахаар болжээ. Энэхүү спорт нь 1982 онд Японы Тоттори мужийн Юрихама хотод үүссэн, энгийн хялбар дүрэмтэй, цагийн хязгаарлалтгүй, тоглогчийн тоо хязгааргүй, нас харгалзахгүй, тоглох талбай бэлтгэхэд хялбар зэрэг онцлог давуу талтай юм. Граунд гольфийн спортын төрөл нь 2021 онд Япон улсад зохин байгуулагдах Дэлхийн мастеруудын холбооны их наадмын хөтөлбөрт багтсан. Энэ удаагийн тэмцээнээс шалгарсан тамирчид Дэлхийн мастеруудын их наадамд оролцох эрхээ өвөртлөх аж.
Н.САРУУЛТУЯА