2014 оны Сочигийн олимпийн наадмын хүрэл медальт, дэлхийн мөнгө, хүрэл медальт Казахстаны нэрт уран гулгагч Денис Тен 25 насандаа гэмт этгээдүүдийн гарт амиа алдлаа. Денис Тен автомашиных нь толийг хулгайлж буй хоёр этгээдийг харж, улмаар зодолджээ. Гэмт этгээдүүд түүнийг хутгалчихаад хэргийн газраас зугтсан байна. Тенийг их хэмжээний цус алдсан байдалтай байхыг нэгэн хүн олж, тэр даруй яаралтай түргэн тусламж дууджээ.
Эмнэлэгт хүргэгдэхдээ уран гулгагч гурван литр цус алдсан байж. Эмч нар цус сэлбэж, шуурхай ажилласан ч их хэмжээний цус алдсаны улмаас нас баржээ. Хэрэг Алма-Ата хотноо гарсан бөгөөд гэмт этгээдүүдийг эрэн сурвалжилж эхэлжээ. Денис Тен сарын өмнө 25 нас хүрэхдээ "Одоо би амьдралыг өөрөөр харж чаддаг болж байна" гэж цахим хуудсаараа нийтэлж байсан юм.
Д.НЯМАА
