Тайванийн Тайпэй хотод сонирхогчдын сүмо бөхийн насанд хүрэгчдийн дэлхийн аварга шалгаруулах тэмцээн болж өндөрлөлөө. Дэлхийн аварга шалгаруулах тэмцээний 85 кг-ын жинд Монгол Улсаа төлөөлж оролцсон олон улсын хэмжээний мастер Баасандоржийн Бадрал амжилттай барилдаж аваргын алтан медаль зүүжээ. Тэрээр алтан медалийн төлөөх хариуцлагатай барилдаанд сумо бөхийн эх орон Японы тамирчинг хөлд нь ороод даваа авсан юм. Б.Бадрал өмнө дэлхийн аварга шалгаруулах тэмцээн Монголд болоход хүрэл медаль хүртэж байжээ. Дэлхийн аварга маань сүмо бөхөөс гадна олс таталтын Ази тивийн аварга шалгаруулах тэмцээнээс хошой мөнгөн медаль зүүж байсан юм.
Д.НЯМАА
