Булган аймаг байгуулагдсаны түүхт 80 жилийн ойн их баяр наадам амралтын өдрүүдэд болж өндөрлөлөө.
Баяр наадмын зохион байгуулах комиссоос аймгийн цол чимэг олгох барилдааныг улсын цолтой бөх оролцуулалгүй тусд нь зохион байгуулсан юм. Цол чимэг олгох барилдаанд аймгийн хурц арслан Ө.Сүхбат, аймгийн арслан Б.Хашбат, А.Отгонбаатар нараар ахлуулсан хүчит 256 бөх барилдсан юм.
Тус барилдаанд Булган аймгийн Орхон сумын харьяат аймгийн начин Энхбатын Сумьяабат найм даван түрүүлэ аймгийн арслан цол хүртсэн байна. Могод сумын харьяат сумын заан Баатарын Баяржаргал долоо даван үзүүрлэж аймгийн заан цол хүртсэн.
Бөхийн барилдааны их шөвөгт Булган Сайхан сумын харьяат аймгийн арслан Ганпүрэвийн Ганбаатар, Хутаг-Өндөр сумын харьяат аймгийн арслан Хутагийн Цогтгэрэл нар шалгарч чимэг нэмжээ.
Баянхонгор аймгийн Баянлиг сумын харьяат сумын заан Ч.Алтангэрэл, Булган аймгийн Бүрэгхангай сумын заан Б.Гаамаа, Сэлэнгэ аймгийн харьяат Мөнхбат нар тав давж аймгийн начин цолны болзол хангажээ.
Түрүү бөхийн тааварт байсан аймгийн заан Э.Энх-Амгалан бөхийн барилдааны дөрвийн даваанд аймгийн заан О.Мөнх-Ирээдүйд, аймгийн харцага Д.Пүрэвдорж гурвын даваанд аймгийн начин Чимэддоржид өвдөг шорооджээ.
Д.НЯМАА