Ирэх аравдугаар сард Унгарын Будапешт хотод бөхийн чөлөөт барилдааны дэлхийн аварга шалгаруулах тэмцээн болно. Тус тэмцээнд оролцох тамирчдыг сонгон шалгаруулах сорил тэмцээн амралтын өдрүүдэд Спортын төв ордонд болж өндөрлөлөө.
Эрэгтэйчүүдийн 57кг-д ДАШТ-ий хошой хүрэл медальт гавьяат тамирчин Эрдэнэбатын Бэхбаяр урьдчилсан шатнаас гарч ирсэн Азийн аваргын мөнгөн медальт залуу тамирчин З.Занабазарыг хоёр барилдаанд илүүрхэж Унгарыг зорих эрхээ авчээ.
61 кг-д оюутны дэлхийн аварга Түмэнбилэгийн Түвшинтулга хамт бэлтгэл хийдэг Г.Отгонбаатартай гурван барилдаан хийж хоёр ялж хоёр дахь удаагаа дэлхийн аваргад орохоор болжээ.
65кг-д Азийн залуучуудын аварга “Арслан” клубийн залуу тамирчин Т.Тулга “Алдар” спорт хорооны тамирчин Б.Батмагнайг ялж анх удаагаа дэлхийн дэвжээнд зодоглохоор болов.
Харин 70 кг-ийн жинд “Алдар” спорт хорооны тамирчин насанд хүрэгчдийн улсын аварга олон улсын хэмжээний мастер Б.Бямбадорж олон улсын хэмжээний мастер С.Ганбаярыг ялж анх удаагаа дэлхийн аварга шалгаруулах тэмцээнд зодоглох нь ээ.
Эрэгтэйчүүдийн 74 кг-д гавьяат тамирчин Г.Мандахнаран, 79 кг-д гавьяат тамирчин П.Өнөрбат, 86кг-д олон улсын хэмжээний мастер О.Үйтүмэн, 92кг-д олон улсын хэмжээнй мастер Л.Төртогтох, 97кг-д “Аврагч” спорт хорооны бөх олон улсын хэмжээний мастер Ө.Батзул, 125 кг-д Азийн аварга Н.Золбоо нар дэлхийн аварга шалгаруулах тэмцээнд оролцохоор болжээ.
Энэ тэмцээний оргил барилдаан эмэгтэйчүүдийн 62-кг-д болж 2017 оны дэлхийн аварга П.Орхон дэлхийн хошой аварга хөдөлмөрийн баатар С.Батцэцэгийг хожиж аваргаа хамгаалахаар Унгарыг зорихоор болжээ. Мөн дэлхийн аварга шалгаруулах тэмцээний алт мөнгөн медальт гавьяат тамирчин С.Цэрэнчимэд залуучуудын дэлхийн аварга Алтанцэцэгийн Батцэцэгт хожигдож дэлхийн аварга шалгаруулах тэмцээнийг зурагтаар үзэхээр болжээ.
Мөн ДАШТ-ий мөнгөн медальт Эрдэнэчимэгийн Сумъяа, Залуучуудын Дэлхийн аварга Эрхэмбаярын Даваачимэг, Баатаржавын Шоовдор, Хүрэлхүүгийн Болортуяа эх орноо төлөөлж Будапештын дэвжээнд гарахаар болжээ.
Д.НЯМАА
