Азийн наадмын эрэгтэйчүүдийн сагсан бөмбөгийн тэмцээний хэсгийн шатны тоглолтууд өндөрлөж шилдэг найман багийн нэр тодорсон.
Шөвгийн наймын эхний тоглолтууд өчигдөр болж өндөрлөлөө.
Үндэсний сагсан бөмбөгийн холбооны Кливланд Кавалерс багийн холбон тоглогч Жордан Кларксоноор хүчээ зузаатгасан Филиппийний шигшээ баг БНСУ-тай тулж 91:82-оор ялагдаж тэмцээнээ өндөрлүүллээ.
Энэ тоглолтд БНСУ-ын төвийн тоглогч Ратлиф Рикарду Престон 30 оноо авч багаа хожилд хөтөлсөн юм. Мөн Ким Сан Хён, Хё Ил Ян нар сайн тоглож 17 оноо авчээ. БНСУ-ын баг тоглолтын турш холын зайнаас 34 удаа довтолж 12-ыг нь оноо болгосон юм.
Харин Филиппиний багаас Жордан Кларксон 25 оноо түүж багаа тэргүүлжээ. Тэрбээр холын зайнаас 13 шидсэн ч ердөө дөрвийг нь л байнд тусгасан нь хожигдлын гол шалтгаан болсон юм. Ингэснээр БНСУ-ын сагсан бөмбөгийн шигшээ баг их шөвөгт шалгарч байна.
Мөн энэ өдөр Ираны шигшээ баг Японы багийг 93:67-оор илүүрхэж шилдэг дөрөвт шалгарчээ.
Өнөөдөр 10:00 цагаас Монголын эмэгтэйчүүдийн шигшээ баг Тайландтай таваас наймдугаар байрын төлөө тоглох хуваарьтай байна.