Азийн наадмын боксын тэмцээний төрөлд Монголын тамирчид эхний медалиа авлаа. Эрэгтэйчүүдийн 60 кг-д өрсөлдсөн Э.Цэндбаатар хүрэл медалийн төлөө Туркменистан улсын боксчин Хурсанд Иманкулиевийг 5:0-ээр ялсан юм. Манай тамирчин хагас шигшээд БНХАУ-ын боксчин Шан Жүнтэй тулалдахаар болжээ. Тэрбээр өнгөрсөн онд Ази тивийн аварга шалгаруулах тэмцээнээс хүрэл медаль хүртэж байсан юм. Энэ жингийн нөгөө талд дэлхийн залуучуудын АШТ-ээс хүрэл медаль хүртэж байсан 20 настай Узбекистаны боксчин Абдурасулов Шункор, Тайландын 22 настай тулаанч Ружакран Жунтронг нар хагас шигшээд тулалдаар шалгарчээ. Харин эрэгтэйчүүдийн 52 кг-д тулалдсан Г.Ган-Эрдэнэ хүрэл медалийн төлөө Тайландын Юттапонг Тонгдеег барсангүй. Ингэснээр Жакартагийн рингэнд гарсан манай 10 тамирчнаас 56 кг-д Х.Энх-Амар, 60 кг-д Э.Цэндбаатар, 64 кг-д Б.Чинзориг, эмэгтэйчүүдийн 51 кг-д О.Жаргалан нар тэмцээнийг үргэлжлүүлж байна.
Д.НЯМАА