Зүүн Азийн АШТ-ний нэгдүгээр шатанд өрсөлдсөн Ц.Ганболд дасгалжуулагчтай эмэгтэйчүүдийн шигшээ баг өчигдөр Макаогийн багтай 0:0-ээр тэнцэж 7 оноотой хэсгээ тэргүүлэн дараагийн шатанд өрсөлдөх эрхээ авлаа. Эмэгтэйчүүдийн үндэсний шигшээ баг ийнхүү эрхээ авсанаар Зүүн Азийн АШТ-ний 2-р шатны тэмцээнд оролцохоор 12-р сард Гуамыг зорино.
Тус тэмцээнд БНХАУ, Тайвань, Хонгконгийн шигшээ багууд манай улстай өрсөлдөх юм. Ийнхүү Монголын эмэгтэйчүүдийн анхны үндэсний шигшээ багийнхан Зүүн Азийн АШТ-ний нэгдүгээр шатны аварга болсноос гадна манай шигшээ багийн ахлагч О.Цасан-Охин шилдэг тоглогч боллоо. Үндэсний шигшээ багийнхан анхны тэмцээнээ амжилттай давсан бол манай улсын эмэгтэйчүүдийн шигшээ багийн ихэнх хэсгийг бүрдүүлдэг 16 насны шигшээ баг 9-р сарын 15-23 өдрүүдэд Азийн Хөлбөмбөгийн Холбооны 16 хүртэлх насны АШТ-ний урьдчилсан шатанд хүч үзнэ. Энэ тэмцээн мөн л түүхэндээ анх удаа Монгол улсад зохион байгуулагдана. Лаос, Энэтхэг, Хонгконг, Пакистаны шигшээ багууд Улаанбаатар хотноо хүрэлцэн ирж өрсөлдөнө.
Мөн манай охидыг 11-р сард бас нэгэн томоохон тэмцээн хүлээж байгаа нь 2020 оны Олимпийн наадмын эмэгтэйчүүдийн хөлбөмбөгийн тэмцээний сонгон шалгаруулалт байх юм. Тус тэмцээн одоогоор хаана болох нь тодорхой болоогүй ч 11-р сарын 4-13 өдрүүдэд Монгол, Тайвань, Филиппин, Сингапур, Тажикистаны багуудын хооронд болно.
Д.НЯМАА
