Беларусын Гомель хотод 100 буудалт даамын өсвөр, залуучуудын дэлхийн аварга шалгаруулах тэмцээн аравдугаар сарын 28-аас арваннэгдүгээр сарын 4-ний өдрүүдэд болж өндөрлөлөө. Тэмцээнд 15 орны 250 гаруй тамирчид өрсөлдсөнөөс Монгол Улсын баг тамирчид нас бүрийн ангилалд оролцож алт, мөнгөн медаль тус бүр нэгийг хүртэж багийн дүнгээр зургадугаар байрт шалгарлаа.
Монголын баг тамирчид тэмцээний үндсэн төрлөөс мөнгөн медаль хүртсэн бол блиц төрөл буюу түргэвчилсэн тоглолтоос нэг аваргатай болсон юм.
Тэмцээний үндсэн төрлийн охидын 8-10 насны ангилалд Б.Есүй найм дахь өргийн дараах байдлаар тэргүүлж байсан ч сүүлийн өрөгт Беларусын тамирчин Любойд хожигдож шагналт дөрөвдүгээр байр эзлэв. Мөн охидын 11-13 насанд Б.Лхагвадолгор сүүлийн өрөгт БНХАУ-ын тамирчинг хожсон бол хүрэл медаль зүүх байсан ч чадсангүй.
Хөвгүүдээс хамгийн өндөр амжилтыг 14-16 насанд М.Лувсандорж үзүүлж, шагналт тавдугаар байрыг эзэллээ.
Тэмцээний үндсэн төрлийн дүн есөн өргийн дараах дүн гарахад өсвөрийн ахлах нас буюу кадетын ангилалд өрсөлдсөн спортын мастер Б.Мишээл зургаа хожиж, хоёр тэнцэн, нэг хожигдож, нийт 14 оноо авснаар мөнгөн медаль хүртсэн юм. Тэрбээр ОХУ-ын Ольга Балуковтай адилхан оноотой байсан ч коэффициентийн зөрүүгээр хоёрдугаар байрт бичигдлээ.
2018 оны өсвөрийн дэлхийн аварга шалгаруулах тэмцээнээс мөнгөн медаль хүртсэн Б.Мишээл 2016 онд Туркийн Измирт зохиогдсон өсвөрийн ДАШТ-ий блиц төрлөөс хүрэл медаль хүртэж байсан юм. Тэрбээр энэ жил үндсэн төрөлд мөнгөн медалийн эзэн болсноор Монголын даамчдын амжилтыг үргэлжлүүлэв.
Блиц буюу түргэвчилсэн төрлийн дэлхийн аварга шалгаруулах тэмцээний охидын 8-10 насны ангилалд өрсөлдсөн Б.Есүй түрүүлсэн юм. Тэрбээр есөн өрөг тоглохдоо долоо хожиж, нэг хожигдон нийт 15 оноогоор блицийн дэлхийн аварга боллоо.
Беларуст болсон 100 буудалт даамын өсвөр, залуучуудын ДАШТ-ээс ОХУ таван алт, найман мөнгө, хоёр хүрэл медальтайгаар тэргүүлсэн юм.
О.ДАШ