Талбайн теннисний эрэгтэйчүүдийн АТР Finals тэмцээний хэсгийн тоглолтууд үргэлжилж байна. Тэмцээний Л.Хьюитт хэсгийн хоёрдугаар тойргийн тоглолтууд явагдаад байгаа юм. Одоогоор тус хэсэгт Өмнөд Африкийн К.Андерсон 3 тоглолт хийхээс 2 тоглолт хийж хоёуланд нь хожил аваад байна. Эхний өрсөлдөгч болох Австрийн Д.Димийг хожоод байсан бол Японы К.Нишикориг буулгаж авсан юм. Тус тоглолтонд К.Андерсон Япон залууд ердөө ганцхан гэйм алдаж 6-0, 6-1 харьцаагаар хожсон.
Тэгвэл замналынхаа 100 дахь цомын төлөө тоглож буй Р.Федерер эхний өрсөлдөгч К.Нишикорид ялагдаж хүнд байдалд орсон. Харин удаах тойрогт Австрийн теннисчин Д.Димийг 6-2, 6-3 харьцаагаар хожиж хасагдах шатанд үлдэх эрхийн төлөө өөртөө боломжийг бий болгосон юм. Залуу теннисчин Д.Димийн хувьд Р.Федерерт хүчтэй өрсөлдөгч юм. Өмнө нь тэд 3 удаа таарч тоглоход сүүлийн 2 тоглолтоос залуу теннисчин Д.Дим хожоод байсан. Ямартаа ч хашир туршлагатай Р.Федерер залуу теннисчинг энэ удаа зогсоож чадлаа.
Харин өнгөрсөн шөнө шийдвэрлэх гуравдахь тоглолтоо Өмнөд Африк залуу К.Андерсонтой хийж 6:4, 6:3-аар ялжээ. Федерерийн хувьд Андерсоныг тав дахь удаагаа хожиж буй нь энэ юм. Өмнө нь тав удаа тоглохдоо дөрвөн удаа хожиж 2018 оны Уимблидоны дунд шөвгийн тоглолтод ялагдаж байсан юм.