Сонирхогчдын боксын эмэгтэйчүүдийн дэлхийн аварга шалгаруулах тэмцээн Энэтхэгийн нийслэл Дели хотноо үргэлжилж байна. Тэмцээний медалийн төлөөх тоглолтууд өчигдөр явагдсан юм. 33 орны шилдэг ширэн бээлийтнүүд медалийн төлөө тулалдаж байгаа бөгөөд манай улсаас 54 кг жинд тулалдсан олон улсын хэмжээний мастер M.Нандинцэцэг хүрэл медалийн болзол хангаад байна.
Медалийн төлөө хариуцлагатай тулаанаа Марокко улсын тамирчин Зохра Эз-Захроутай хийж шүүгчдийн саналаар буюу 5:0 харьцаагаар хожсон юм. Зохра Эз-Захроугийн хувьд Рио-2016 Олимпийн их наадамд оролцож байсан шилдэг тулаанч юм.
М.Нандинцэцэг эхний тойрогт Унгар улсын тамирчин Ц.Цабинаг техникийн илт давуугаар хожсон бол шигшээ шилдэг наймд шалгарах тулаанаа Хорват улсын боксчин Питеса Зелжанатай хийж мөн хугацаанаас өмнө дутуу гаргасан юм.
М.Нандинцэцэг Дэлхийн аварга шалгаруулах тэмцээнээс медаль хүртсэн анхны эмэгтэй тамирчин болж байна. Манай тамирчин өнөөдөр мөнгөн медалийн төлөө Болгар улсын боксчин Стойка Петроватай тулалдах юм.
О.ДАШ
