Манай улсын хувьд 2015 оны байдлаар тамхинаас үүдэлтэй зүрх судасны өвчнөөр 2200 гаруй хүн нас барсан гэсэн судалгаа байдаг. Асуудал ийм учир тамхидалт болон дам тамхидалтаас сэргийлэх, багасгах мөн ажлын байрыг тамхины утаанаас ангид байлгах зорилготой нөлөөллийн уулзалтыг олноор зохион байгуулсан. Нөгөөтэйгүүр манайд хэдий тамхины хууль байгаа ч хэрэгжилт байхгүйг эмч мэргэжилтнүүд хэлсээр ярьсаар...
2012 онд Тамхины хэрэглээний хяналтын хуулиар үйлдвэр, олон нийтийн газруудын дотоод орчинд тамхи татахыг хориглосон юм. Гэвч 2015 онд хуулийн нэмэлт өөрчлөлтөөр томоохон барилгын талбайн гадна тамхи татах цэг байхыг зөвшөөрснөөр энэ хуулийн хүч суларсан юм. Тиймээс энэ хуулийг эргэн харж засаж сайжруулах шаардлагатай.
Дэлхий нийтээр 11 дүгээр сарыг уушгины хавдарт анхаарал хандуулах сар болгосон. Учир нь тамхины хэрэглээ нь уушгины хавдрын гол шалтгаан юм. Манай улсад 2017 оны байдлаар 2.9 тэрбум ширхэг тамхи импортолж, 141 тэрбум төгрөгийг зөвхөн тамхи импортлоход зарцуулжээ.
Монгол Улсад насанд хүрсэн эрэгтэйчүүдийн 49.1%, эмэгтэйчүүдийн 5.3% нь тамхи татаж, сүүлийн 10 жилд тамхинаас үүдэлтэй зүрх судасны эмгэгээр нас барах явдал 2 дахин нэмэгдэж, нас барж байгаа 3 хүн тутмын нэг нь зүрх судасны эмгэг, 5 хүн тутмын нэг нь хорт хавдрын улмаас нас барж байна.
Иймээс тамхины тухай хуульд нэмэлт өөрчлөлт оруулж, хуулийн хэрэгжилтэд аж ахуй нэгж иргэн бүр санаачилгатай ажиллах хэрэгтэй байна.
Ц.ТЭГШБУЯН
